Per l’incumbensa da service public da la SRG SSR è il schurnalissem independent central. Cun mintga cuntegn – saja quai videos, audios u texts – rapportain nus da quai che capita enturn nus, contextualisain fatgs u als mettain en dumonda a moda critica, dain orientaziun en la debatta publica e rinforzain la furmaziun da l’opiniun ch’è decisiva per nossa democrazia directa. Cun noss schurnalissem fidà contribuin nus a la chapientscha vicendaivla ed uschia er a la coesiun da la societad. Quai è nossa responsabladad.

Questas directivas publicisticas èn vegnidas consolidadas per l’emprima giada sur tut las regiuns linguisticas or e defineschan il rom cuminaivel per tut quellas e quels che contribueschan als cuntegns da la SRG SSR. Ellas èn liantas en il mintgadi e valan tant per l’infurmaziun sco era per la cultura, il divertiment, il sport, la societad, la furmaziun e la savida. Mantegnend la diversitad da las regiuns linguisticas e las particularitads dals singuls geners stgaffeschan las directivas publicisticas da la SRG SSR princips, standards e responsabladads cuminaivlas per l’entira interpresa.

Relevanza, professiunalitad, independenza, diversitad ed accessibladad èn la basa dal schurnalissem da qualitad. Quests princips pretendan che nus tractian cun quità e responsabladad fatgs e funtaunas, che nus differenzieschian tranter opiniun persunala e tenuta schurnalistica e che nus stgaffeschian transparenza areguard nossas decisiuns e noss process. Nus examinain cuntegns a moda critica, tematisain malsegirezzas a moda clera e surpigliain responsabladad per l’effect che nossa lavur ha sin il public. Accuratezza, premura, transparenza e l’abilitad d’esser autocritica èn elements essenzials da la credibilitad da la SRG SSR – en tut ils geners e formats.

Cun il confess publicistic dat quest document in rom che declera co che nus chapin noss servetsch al public e cun las directivas dat el instrucziuns d’agir concretas per il mintgadi schurnalistic. Uschia rinforzain nus la qualitad publicistica che segirescha e garantescha la finala tut nossas valurs.

En in ambient da medias che sa mida svelt e ch’è marcà da la multiplicaziun da las plattafurmas, da la dischinfurmaziun e da la polarisaziun creschenta dovri pli che mai in schurnalissem curaschus, independent e transparent. Questas directivas n’èn betg ina collecziun da reglas statica, mabain in instrument viv che vegn sviluppà vinavant cuntinuadamain. La realisaziun pretenda attenziun, dialog e la prontezza d’adina puspè analisar a moda critica nossa lavur – collià cun la pretensiun da daventar adina meglra e cun la tenuta che nus stuain adina puspè gudagnar da nov la confidenza dal public. Mo uschia po il service public subsister e vegnir rinforzà vinavant sco punct da referenza credibel e relevant.

Susanne Wille, directura generala da la SRG SSR