Las directivas publicisticas defineschan l’identitad schurnalistica da la SRG SSR: sco rait da coordinatas a la quala nus ans orientain, determineschan ellas ils criteris da qualitad e da standards, per ademplir nossa incumbensa da service public. Ellas marcheschan dentant er ils cunfins entaifer ils quals nus collavuraturas e collavuraturs da la SRG SSR stuain ans mover.

En la lavur quotidiana gidan schurnalistas e schurnalists u collavuraturas e collavuraturs da medias nus da satisfar a nossas autas pretensiuns a la professiunalitad publicistica. Per las superiuras ed ils superiurs èn ellas ed els la basa per la controlla da la qualitad e per las decisiuns publicisticas.

Las directivas publicisticas èn publicas. Perquai essan nus pertschert:as che nossa purschida e noss cumportament sco collavuraturas e collavuraturs da la SRG SSR vegnan mesirads a basa da quellas.

Las directivas publicisticas na delibereschan betg las collavuraturas ed ils collavuraturs da l’atgna responsabladad. Ellas laschan spazi da decider en il cas singul. Sch’ellas na gidan betg vinavant en situaziuns excepziunalas, èsi da consultar la persuna superiura. Sch’igl è necessari da prender decisiuns da gronda muntada, vegnan quellas prendidas da las persunas responsablas en dumondas publicisticas. En intgins cas èn quels d’involver stringentamain.

Las directivas publicisticas èn en intgins lieus pli strictas ch’il dretg. Quai ch’è gist anc permess legalmain po gia surpassar il cunfin publicistic. En cas delicats èsi da consultar il servetsch giuridic da la SRG SSR e las persunas responsablas en dumondas publicisticas.

Las directivas publicisticas n’èn mai cumplettas u finidas. Pervi dals svilups actuals ston ins da temp en temp adattar u surlavurar ellas. Quest svilup capita en in process participativ: Tut las collavuraturas ed ils collavuraturs da la SRG SSR duain sa participar a moda activa.

Infurmaziuns da basa ed agiuntas impurtantas a las directivas publicisticas (p.ex. texts da leschas) sa chattan en l’annexa.